نظرة فى وش الناس فى بلدى

مش عارفه ابدا منين ولا ازاى .. الافكار هجمت على راسى زى المطر مره واحدة الحمد لله دى نعمة من ربنا ناس كتير محرومة منها

، نعمة انك يكون عندك وسيلة تعبير عن افكارك متهيالى لو مش عند كل واحد فينا الوسيلة اللى ربنا يسرهالو كان ممكن مخنا ينفجر من كتر افكارنا - طبعا د باعتبارنا شعب مابيبطلش تفكير ليل نهار
عاوزة اتكلم عن الوجوه فى بلدى ايوه الوشوش فى مصر ! ! بعمقها و جمالها و السحر اللى فى كل تجعيده و لفته كلامى غريب ؟ ؟ جايز بس دى قرائتى الخاصة جدا فى وشوش الناس " المصرية " تحديدا
من صغرى عندى هواية البحلقة فى وشوش البشر يمكن د عشان حبى للرسم او يمكن العكس ، يلا مش وقت تحليل شخصيتى دلوقتى ..عمركو بخلقتو فى وشوش الناس فى الشارع ؟ كانوا دايما يقولو ان الناس نوعين : نوع يبان عليه بسرعة

ونوع تانى بيعرف يدارى
انا شايفة ان الناس فى بلدى نوع واحد.. هو النوع الاول و الحكاية مش انهم بيعرفو يدارو

الشخصية المصرية هى الشخصية الدرامية الاولى فى العالم

المصرى لوحده كده من غير ما ينطق ولا يتكلم لوحده حدوته كبيرة والحدوتة الكبيرة دى بكل تفاصيلها مرسومة على وشه بدقة لا يعلمها الا سبحانه و تعالى
كل انسان فى بلدى حكايته منحوته على وشه .. مهما كانت طبيعته من بين طبايع البشر المختلفة و الشاطر اللى يعرف يقراها احنا بلد " نجيب محفوظ " بلد ملايين الحكايات ... الزمن بيرسم حكايتنا على وشنا بالوان الحياة و الواقع بدقة باستغربلها فى كل لحظة ياترى د من كتر اللى مر على المصرى من ظلم و قهر ؟ ولا دى وسيلة المصرى-وسيلتنا- اللارادية فى التعبير عن افكاره اللارادية و اللى ساعات بتخنقه !! وياسلام بقى لو اتكلم ابن بلدى و حكى .. اسمع كده ولا اجدعها استاذ دراما و ادب يعرف يألف و يكتب زى ماهو بيحكى بعفوية ساحرة ، و سخرية عبقرية من المه ، و تحليل لمشاكله و مشاكل اللى حواليه بفلسفة خاصة جدا ماتنفعش غير له هو بس - وانا قاصده كلمة فلسفة بمعناها الحقيقى - ابن بلدى فيلسوف بالفطرة على تنوع درجة ثقافته. فلسفته دى هى اللى بترسم حكايته على وشه بريشة الوقت و الزمن
الناس فى بلدى اغنياء

الناس فى بلدى ثروة

الناس فى بلدى كنز

الناس فى بلدى هرم اكبر - مش هرم رابع
الناس فى بلدى تفاصيل صغنونة فى حكاية الحضارة البشرية لو اتجمعت ح تعمل جدارية حتحكى تاريخ الانسان
الناس فى بلدى تستاهل احسن من كده

بجد يستاهلو احسن من كل ده